《「我的選擇」》

　尋日同老友飲茶，天氣不似預期，3號風球、黃雨、黑雨，總之就橫風橫雨；Ruby 提我搭地鐵穩陣啲，我當然係搭巴士啦，結果，喺鳳德邨行去龍蟠苑，行天橋已經濕晒個人，四圍都係水氹，連對鞋對腳都濕埋，Ruby 對此回應拋下一句「U have you own choice」你有你自己的選擇！

　細個嘅時候，對於創造世界嘅神印象唔係咁好，覺得佢創造咗呢個「世界」大玩具之後，唔知佢幾時會踢散佢？

　早幾日行過牛頭角下邨，起得好靚嘅屋邨，樓下都有公園環繞，𥚃面竟然有單車徑定係緩跑徑之類；今時今日嘅公共屋邨真係正，重要喺正地鐵站隔離，超方便！人人營役一生，莫不只求一宿三餐，安居樂業，如此的生活環境，真係俾我住成世都願，夫復何求！

　人係進步嘅！所以亦都可以自以為比於天高，依家做大地管理者梗係營造出美好環境，等你生活得開開心心，舒舒服服啦！咁你咪可以安安樂樂過埋下半世，最緊要係我幫你安排好晒，唔使你操心…你無得揀，亦都唔使揀，你又少一樣煩惱啦！

　啲人形容小朋友係trouble two 麻煩兩歲，初一依家差唔多3 歲半都仍然好麻煩，成日都呢樣唔好嗰樣No ，我要呢個要嗰個…其實，trouble two 麻煩兩歲呢個邏輯，係咪都話俾我哋知，人類從成長發展認知能力之時，就開始表達天賦自我應該有的選擇！