《「神蹟在我手」》

　上個禮拜六，家麒帶咗個舊同事返教會，重點當然係食飯時間啦！世事往往就係咁！當小組有成12 個大人，加多個bb ，就遇上只係俾你4 人一枱嘅餐廳，唯有散落三枱分開食，所以，臨近中秋節，今個星期六大家要預先計劃定揾食啦！

　星期一接初一放學，遇見個口罩媽咪拖住個女，Ruby 同佢打招呼叫佢，我完全唔知佢係乜水？重點係，終於都輪到Ruby 發現日日有相遇，每天有特別啦！

　今個禮拜有個老友約我飲茶，當然係最美好嘅開始！食飯係其次，原來，專登送盒月餅俾我…月餅，就真係我送俾人多，我都係第一次收到！最後我哋去咗波士頓食西餐，再約，月尾去飲茶補返數！

　Jonathan 天湛真係大個仔啦！今個月，我除咗薯片、啤酒之外，Jonathan 仲拎咗5 盒月餅返屋企，我倆公婆依家真係收成期啦！

　咩係神蹟？12個人坐埋一齊食飯係神蹟，12個人拆開做4 人一枱食飯係神蹟；老友記送你月餅係神蹟，個仔出嚟工作，拎咗5 盒月餅返屋企請你食係神蹟，總之，世界上沒有必然的，也沒有巧合的，你懂得又享受上天賦予你的，就是神蹟！