《「急速都市中慢步」》

 　早兩個禮拜廁所燒咗一盞天花燈，即刻上網睇吓點樣更換先，可以一試！量度過盞燈嘅外圍直徑，出去睇又發覺價錢可以差好遠，由$60至$260…返屋企再諗清楚先，叫師傅嚟更換還是自己換？決定自己一試，買燈前，老闆再三提醒「係量度假天花開窿直徑尺寸」，要返屋企再度過；打開假天花準備度尺寸，發現原來係兩條接駁電線的其中一條燒了，斷咗，自己駁返條電線，維修完成！

　壞咗盞燈，揾師傅三幾百蚊即刻攪掂，但攪嚟攪去，兜兜轉轉，兩個禮拜後先至發現原來咁小事，原來慢都可以好過快嘅！

　星期日，一行4人行荃灣海濱，由荃灣碼頭出發，終點係深井。經過從前叫幾多咪幾多咪的泳灘，泳灘多半已經湮沒在道路工程擴建底下，行過之前教會舉行浸禮的酒店，轉過彎，終點在望，看到了麵包廠，當然係要到此一遊，Ruby 買了麵包條，那個免費的背心膠袋更附上了童年回憶呢！抵！

　沒有食預期的深井燒鵝，幫襯了茶餐廳點心，配上了運動完的大枝裝凍檸樂，滿足！回程增遊六廠、新開幕的日式超市；回程車上較了30分鐘鬧鐘提示，鬧鐘喚醒剛好是下一個站落車，兩公婆為外母預備晚餐。

　這一天，只是安排一個海濱行程，午餐可以改，行程可以增加，只係因為今天唔趕時間，可以慢，所以事情變得「可以」！