《「家電殺手」》

　上個月某個晚上等老婆收工，兩公婆揾地方開飯，走到廿年前的這一間冬菇牛腩麵小店，緬懷一下！首先，小店竟然仍然健在，食品也多元化了—本身係一間麵店但依家有飯食；當晚我點了蒸黃花魚套餐，包凍飲就只是$40，麵店的茶飲當然唔好有期望啦！條魚係即叫即蒸，蒸得啱啱好，絕不細條呃秤，勁抵！

　上星期又係兩公婆撐枱腳的晚上，對這小麵店念念不忘的我，又走到這裡，點了煎紅衫魚套餐—有兩尾紅衫魚呢，給我連頭帶尾吃掉；今次的新點子，我發現這店子的店員與食客都超熟悉，話題徘徊在大家身上周邊，勁有一家人的感覺！

　新屋裝修工程大致完成，星期一，走上新屋稍作廳房清潔，臨走前最後一抹，塊玻璃被我隻右手揩咗一嘢—係我𠝹親塊玻璃...收工！星期三重陽節假期，又去新屋清潔，今次清潔廚房、廁所，今次被個鋼絲擦𠝹親左手...星期五，上新屋不再攪清潔，兩隻手都好安全！

　有人好奇點解我咁孤寒，駛少少錢揾人做裝修後清潔咪方便穏陣無煩惱囉！我就係鍾意自己無乜錢，生活中經常要幹些粗活，洗車係同架車建立關係、抹地係同間屋建立關係，洗風扇係同風扇建立關係—因為洗爛咗幾把風扇，我的外號是「家電殺手」！

　透過今次清潔新屋的經驗，我相信我的新名字應該叫「家電𠝹手」，但我仍然好想與身邊的...建立關係！