《「開工」》

   　2018年突發性開展搬屋工程，5月5日簽署了臨時買賣合約，8月7日一手交錢一手交樓，正式成交，8月17日揾好裝修公司，8月20日正式開工。看似順利，咩為之順利？對我來說，沿途迂迴崎嶇起伏...預咗啦！總之準時去到下一站就最重要！

   　上個禮拜同Sarah 食tea 傾計，坐咗一陣傾咗一輪，遇見拉哥拉嫂去同一食肆開餐，四個人又傾咗一陣，拉哥拉嫂重埋咗張單；我同Sarah 講「你的事情我無能力解決，拉哥拉嫂都解決唔到，但係你遇上了天使，你有足夠能力可以行多一步」，星期六崇拜Sarah 分享為自己做一件事「希望每個禮拜都分享」—先決條件係每個禮拜同老公一齊返教會！

   　星期一開工拆嘢，星期二去葵芳，星期三揾小玉，星期四細仔生日飯，星期五出旺角，星期六睇大門房門，星期日開執事會；唔係想講到我好似好多嘢做，係每個人每一日都在「開工」，恆常不變的工作可能使你鬱悶，醒目嘅你會洞察到每天也有不同的工作在開展，你順勢而開工，生活便會豐富滿有色彩！

   　世界每天在轉，當遇上順流你會乘勝追擊，遇到逆境你就要釜底抽薪，儘管似乎平常無事無幹，你都要開工！