《「愛你一個月」》

　一般打工仔，返工都有試用期，由一個月至半年不等。打工仔都在這試用期內誠惶誠恐，總之，都要做足120分，不辭勞苦，不計較OT ，我愛你一個月、三個月，或是半年，最緊要過到試用期...關係，熟真熟假，通通被利害汚染了！ 

　上年呢個時候同Ruby 去咗南美旅行，玩足3 個禮拜，真係明白咩叫做留連忘返，每個地方都想停留耐啲，住多幾日；原來，難得愛上幾個星期的，總是渴望與期待，希望時間可以延長！

　愛你一個月—係滿月呀！

　初一bb 滿月了！鴨髀變豬髀，大隻咗，扎實咗、攪笑咗、愈來愈曳，醜樣肉酸咗...呢個月，食得、瞓得，疴得—健康之道，乃放諸四海而皆準也，不論你任何年齡都啱使都啱用！父母的愛是24 小時全天候多功能無限際數據任用的，點止愛你一個月！

　愛你一個月—係世界盃至真。我並不是甚麼瘋狂球迷，對我或是部分人來說，世界盃卻是一個朋友聯誼的媒體，三五好友，熟朋友或是唔係咁熟都無所謂，玩吓啫！啤酒汽水薯片零食，嘻嘻哈哈，如果可以夾到十個八個老友，一齊睇番十場八場比賽，呢啲友誼增強劑，一定可以維持到下一個四年！我呢我呢我呢！