《「愛慢連—愛你10000年」》

　現代人男男女女都好獨立，思考獨立，經濟獨立—一切都係我話事，世界只能夠隨著我隨走，地球只可以圍著我轉。香港政府教育兩公婆分開名購買物業，在稅務上會著數過聯名買樓，如此一來，強化了夫妻之間既獨立又分割的情況！而我就係無知地贊成兩公婆聯名買樓的小眾儍人！

　電影對白「如果要在這份愛上加一個期限的話，我希望是一萬年」，講者情深，聽者至冧，流行到今時今日，點解？大多數浪漫的事情都會有著「無可能」的原素！「樂頌」今年「等100年，都想跟你走」，都係無乜可能發生，但好似都有少少、少少可能性，諗吓都覺得有盼望！

　但，原來愛一個人10年係好難！例如，有一日我兩公婆有衝突嗌交，結果只能夠一個喺房一個出廳，無經濟本事者，就是10年、20年，30年都離不開這聯名下的四幅牆；至於經濟獨立、買樓獨立的一群，遇到衝突時，就好容易分辨到邊個住呢度，另一個可以住第二度，就是經濟獨立的門是太過容易打開了！邊樣好？你㨂邊樣咪知道你想點囉！

　「獨立」兩個字好像教育我們要自私多一點，兩個人戀愛、結婚，不是要分享愛嗎？每對結婚新人講一生一世都認真不過，但又知否愛實在是需要慢慢培育、建立，連繫，並不會一蹴而就，言下之意，是兩個人需要在年月間慢慢連繫起來。