《「我好愛你」》

　新十五，大家都會將年花大桔丟走，我順便丟咗對波鞋—只用了半年左右，但是某個位置已經開始爛爛哋！為了祝福下一手有緣用家，加上細仔Jonathan 早兩個月送咗一對波鞋俾我，使我可以安心放它在後樓梯！

　小弟的源生家庭是住徙置區、公屋大的，未至於家徒四壁，但肯定一句，賊仔都唔吼我屋企；爸爸媽媽生於國內又捱過飢餓饑荒，要養大6個仔女，談何容易！爸爸媽媽教落，做人要知慳識儉，唔好亂咁揮霍，要積谷防飢...時移世易，從上一輩的天生天養，俾你食得飽、穿得暖，以致今天的豐富到嘔，多到瀉的新生代，小朋友們已重新演譯了「有又唔旨在，無又唔爭在」的窮濶佬金句！

　夾在新舊之間的我，努力地身教揾錢與洗錢的關係及樂趣—既不可九牛一毛的節儉，也不應洗「突」可以管理的範圍。

　爸爸媽媽都愛錫子女，都會給予、教導最好的；上一代吃過苦、捱過窮，難得温飽—教你最好係「慳d洗」！

一些從没有感受到愛的人是悲慘，但總覺得自己好愛身邊人的，也未必真的給予了別人需要或期望的幸福！