《送你小禮物》

小弟生於香港窮窮哋的60年代，大多數人就真係坊間嗰句「有飯食飯，有粥食粥」；同學街坊間玩的玩具多是自家製作—非因提倡創意或環保，都係一句「鬼叫你窮」！

大個仔拍拖，活動多是行街—唔係shopping購物，係無聊嗰隻；食嘢多數你一啖我一口好浪漫，最鍾意食孖條、油炸鬼，飲支汽水都一定係兩支筒—無錢之下的浪漫……最害怕的日子是女朋友生日，真係唔知送條孖條還是油條好？

刻下的現代人生活富裕了，生命卻並不豐富！人們開始用金錢打造生活，要努力地賺錢，你賺得錢多自覺人家尊重你，你可以用錢塑造你的外面所有派頭，卻修理不到內心；最慘的是，你賺得不多錢的，仍陷落這洗錢迷宮中，無法自拔！這也可見近年多了些年青破產個案，與之不無關係。

諺語謂「千里送鵝毛，物輕情意重」，我們會如何演釋？無錢時會走去執條鷄毛(鵝毛難求)送俾人，有錢時就會花d錢買對袜送給對方，係咪好cheap？當你見到BB、小朋友，對你一頻一笑，對你的一句稱謂，請你食的一粒提子乾、半條百力支，甚至乎食過的口水尾，你都不知幾滋味、幾溫暖！對你愛錫的人就是如此，有天，你會發現最好的禮物是不需花費分毫，對方卻又最鍾意的呢！