《別人笑我太瘋癲》

〝V in concert〞《我們的音樂會》臨近，也是六個月的祝福要來個總結；小弟跨出了「双双喜動」的派頭作邀請，挑戰各位達成双倍之祝福，那麼，小弟現下又如何呢？就是來了兩次由低B進入瘋癲的project工程。

話說大年初六壞了車，師傅話需要更換一台波箱，承惠$6,000；小弟的反應是「壞咗！梗係買過架車啦！我大把」，便預算斥資$70,000買過架二手車，結果，我不到一星期就以$90,000買了架二手車，咁咪超支？答案仍是嗰句「我大把」，當然，十個人見我如斯行徑，總有三幾個覺得我低B！

上個禮拜三，撩起條筋，揾個地產經紀了解行程，問吓環境，結果，禮拜五傍晚決定，夜晚同埋老婆睇樓，連睇連簽合約事宜，45分鐘完成……離開時，兩公婆八隻眼互瞄，過往未經驗過的交流—瘋狂！瘋癲在當晚遇到的朋友們，個個讚好！

今次大工程在於力(財力)有不逮，人總是微少及有限，咩人會成日凝住凝住自己「大把」—背後有著強大的支援後盾者，當然是戰無不勝！

別人笑我太瘋癲，睇吓耶穌有幾堅。